Bilboko Udal Bandaren Zuzendariak

José Rafael Pascual Vilaplana

Bilboko Udal Bandako Zuzendari Gonbidatu Nagusia 2025-2026 denboraldian

Bilbao Musika Banda Bilboko Udal Musika Bandaren Zuzendari Titularra 2015etik 2025era
Muro (Alacant), 1971
Bartzelonako Udal Bandaren zuzendari titularra da 2018tik, Bilboko Udal Bandaren zuzendari gonbidatu nagusia eta zuzendari titularra 2015 eta 2025 bitartean, eta Portoko Portugalgo Banda Sinfonikoaren zuzendari elkartu nagusia da.
Bandako zuzendaritza ikasi zuen Jan Cober (Herbehereak), Eugene Corporon (AEB) irakasleekin eta Orkestrako zuzendaritza Karl Österreicher, Yuji Yuhasa eta Hans Graf (Austria) irakasleekin. Zuzendari gonbidatua da hainbat taldetan: Kubako Banda Nazionala, Holandako Errege Marinaren Banda, Buenos Airesko Udal Banda, Montevideoko BS, Kolonbiako Gazteen Banda Nazionala, Esloveniako SAF Army Band, Wasbe Youth Wind Orchestra (San José, California), Valléseko OS, Murtziako OS, Bilboko Orkestra Sinfonikoa, Kanaria Handiko OF, Gaztela eta Leongo OS, Veneziako Accademia La Fenice OS, Suitzako WB, Coruñako, Alicanteko, Bartzelonako, Tenerifeko Santa Cruzeko eta Konpostelako Santiagoko udal bandak, Oviedoko Kontserbatorioko Banda eta Orkestra Sinfonikoa, Kanarietako Goi-mailako Kontserbatorioko Banda, Granadako BCS, Musikeneko banda, etab. Valentziako Erkidegoko hainbat bandaren zuzendari titularra izan da, baita Albaceteko Orkestra Sinfonikoaren zuzendari nagusia ere 2001etik 2013ra.
Besteak beste, Paquito d'Rivera, Asier Polo, Sergei Nakariakov, Elisabete Matos, Ana Mª Sánchez eta Estrella Morente bakarlariekin elkarlanean aritu da. Luis de Pablo, José Mª Sánchez-Verdú, Leonardo Balada, Johan de Meij, Franco Cesarini, Bert Appermont, Enric Palomar eta Agustí Charles egileen lanen munduko estreinaldiak zuzendu ditu. Kerkradeko WMCren (Holanda, 1997) eta Birminghameko EBBAren (Ingalaterra, 2000) nazioarteko zuzendaritza-lehiaketen irabazlea da. 2020an Bilboko Koral Elkartearen "Maitena Saria" jaso zuen.

Iñaki Urkizu

Bilboko Udal Musika Bandako Zuzendariordea da 2007tik

Bilbao Musika Banda Bilboko Udal Musika Bandako Zuzendariordea
Beasain - Gipuzkoa, 1961
Bere herriko Udalaren Bandan hasi zen tronpeta jotzen, zortzi urterekin, familiaren tradizioari jarraituta. Handik Tolosako Udal Bandara pasatu zen eta han bakarlari jardun zen hamarkada batez. Donostiako Goi-mailako Kontserbatorioan egin zituen tronpeta-ikasketak Juan Manuel Gómez de Edeta irakaslearekin. Irakasle jardun da Beasain eta Tolosako musika-eskoletan, baita "Arrasate Musical"-en ere.
Instrumentista moduan Euskal Herriko talde askorekin elkarlanean aritu da. Horietako aipagarrienak hauexek: Bilboko Orkestra Sinfonikoa, "Arrasate Musical" Orkestra Sinfonikoa, Juan Crisóstomo de Arriaga Kontserbatorioko Banda Sinfonikoa, Donostiako Talde Barrokoa, Lattor metalezkoen boskotea, Araba Brass Taldea eta Gasteiz Big Band; azken honetan, gainera, zuzendaria izan zen.
Bakarlari moduan egindako lana ere aipagarria da, Benantzi Bilbao eta Aitor Olea organistekin, eskainitako organoaren eta tronpetaren kontzertuetan.
Banden munduan oso ezaguna da moldaketak eta transkripzioak egiteagatik eta musika-banda askok jaso ohi dituzte bere lanak programetan. Laurogeiko hamarkadatik aurrerako euskal musikaren bilduma bat prestatu du eta horien lehen lau zenbakiak argitaratuta daude: "Jaialdia", "Dantzaldia", "Kantaldia" eta "Betikoskorri". Azken lan hori izenak, adierazten duenez, Oskorri folk-talde ezagunaren omenez egina.
Halaber, moldaketa asko musika-ikuskizunarentzat egin du, besteak beste, Serafín Zubirirentzat "Recordando a Nino Bravo" eta "El Baúl de los 70".
Ertzaintzako Musika Bandako zuzendaria izan da 1998tik eta banda horretan tronpeta-jole bakarlari-plaza ere izan zuen. Bere batutapean CD bat grabatu da, Bergarako Orfeoiarekin batera, José Franco, Luis Aramburu, José Mª González Bastida eta Juan Arzamendiren lanekin. Bilboko udalaren musika Bandarekin ere zenbait CD grabatu ditu, bata Bilboko Koral Elkartearekin bere 125.urteurrenan "Kantuz Hari den Herria" izeneko musika-lana, bi abesbatza eta Bandarentzat berak idatzita, eta bestea Zarzuelari eskainita, Masa Coral del Ensanche, Miren Urbieta (sopranoa), Vicenç Esteve (tenorra) eta Fernando Latorrerekin (baritonoa).
Zuzendari gonbidatua izan da Euskal Herriko zenbait Bandetan, Barakaldoko udalaren Banda, Durangoko "Tavira" Musika Banda edo Gasteizko Udalaren Banda, besteak beste. SGAEko kidea eta 2017tik Bilboko Udalaren Musika bandaren zuzendariordea da.

Antzinako Zuzendariak

  • Rafael Sanz-Espert (2002-2012)
  • Jesús María Bilbao (1995-2002)
  • Urbano Ruiz Laorden (1984-1995)
  • Antonino Ibarrondo Oleaga (1979-1984)
  • Urbano Ruiz Laorden (1969-1979)
  • Bruno Muñoz (1953-1969)
  • Jesús Arambarri (1932-1953)
  • Pedro Córdoba Rozas (1928- 1931)
  • José Franco Ribate (1924-1927)
  • José Sainz Basabe (1895-1918)